اتنين في واحد

طبعا انا اول مرا اجاوب علي تاج والمرا دي جالي تاجين مرا وحده

من اعز اتنين انا بحبهم وبحب اتابعهم بستمرار
التاج الاولاني جاني من صديقي المدون

wanna b a physician

والتاج التاني من اختي وصديقتي

• فاتيما حبيبه قلبي
  
  طبعا ده تعريف بسيط عني
  
  رودي طبعا ده الدلع بتاعي سواء باسمي اللي في شهاده الميلاد او باسمي المشهورة بيه رودينا
  اسمي اللي في شهاده الميلاد محدش بيناديني بيه لدرجه اني احيانا بنساه هههههههههه
  
  التاج الاول
  اذكر عشر اشياء عن نفسك ؟
  
  مسلمة الحمد الله ، محجبة ، متزوجه ،و ام ايضا لطفه امورة وشقية اسمها نور

بحب الاصدقاء وبعتز بصداقتهم دائما ولكن مقصره احيانا معاهم

هادية جداا وعصبية اووي عاقله جداا ومجنونه ومهوسة

طيبة جداا وايضا قاسية القلب قد اكون حنونه لم انسي الاهانه بسهوله

ومرحه ولزيزة بحب الضحك وحزينه ايضا وانطوائية معظم الوقت

ومتوضعه جداا ولكنني مغروره عندي ثقة في نفسي

اجتماعيه وبحب الناس ولكنني احب الهدوء والجلوس بمفردي

شخصيتي قوية جداا ، لئيمه ، عنادية ، راسي ناشقة متفائلة ويائسة في نفس الوقت

نشيطه ، طموحه ، صريحة ، غامضه لابد الحدود ، ذكيه جداا واوقات بكون غبيه

منظمه جدااا وفوضاوية الي اقصي درجه رغاية اووي وصمتي اكتر

التاج هابعته خمسة لمين اممممممممممممم

وحده مفروسة

قوس قزح

سكر

رئيسة حزب الاحلام
د/ اجدع بنوته

بلغ اللى بعتهولك بانك تنزله رد في المداونته


حاضر جاري تنفيذ الطلب فورا

********************************************************

نيجي علي التاج التاني

تاج الاحلام علي رئي فاتيما



أذكر 5أحلام تخص ماضيك
كنت هتتخلى عن إيه فيها و هتتمسك بإيه لحد دلوقتى


كنت بحلم اني اعيش مع بابا وماما وانهم ميكونش منفصلين واتربي في وسطهم

الحلم ده هيفضل حلمي الماضي والمستقبل
وبجد نصيحه مهمه لي كل ام واب متخلوش الانانية والعناد يجي علي سعاده اولادكم واديهم الحق انهم يتربو في وسطكم زي ما انتم اتربيتو وسط اب وام وزي ما بيشوفو من اصحابهم واقاريبهم (-_-)0

كنت بحلم بقصه حب جميلة اووي ونعيش انا وبطالها اعنف قصه حب بس كانت فيه حاجه جوايا بتقولي اني الدنيا مش هتديني اللي بتمناه وانها هتنتهي قصه الحب دي زي فيلم حافية علي جسر من الذهب واللي بتموت البطله في سبيل سعاده ومستقبل حبيبها او فيلم حبيبي دائما واني اموت من مرض واشوف دموع الحب والحنية في عين حبيبي او زي قصه غاده الكامليا اللي بتكون ضحية ابوها وبتتظلم في حياتها وبتموت برضه ومش بتتجوز حبيبها

مش بقولكم نكادية وحزينه من يومي(^_^)0

كنت بحلم اني اطلع مضيفة والف العالم كلة واخد بابا وماما معايا كل سفارية واتجوز الطيار ونخلف طيارين ومضيفات ونستغل مصر للطيران لحسابنا (*_^) 0

كنت بحلم اني اتجوز اول حب في حياتي و خطيبي الاولاني كنت بحلم اننا نفضل مع بعض دائما

وكان نفسي يحارب الدنيا كلها علشاني زي ما حارب عنتر وقف وحارب علشان خاطر عيون عبلة بنت عمه وعموما الحمد الله اكيد ربنا كان شايف ليا حاجه احسن وربنا مش بيعمل حاجه وحشة وقدر الله مشاء فعل مفيش نصيب

بس الحمد الله دلوقتي مبسوطه وسعيده بي ابو نور وربنا يخليه ليا يارب انسان بيحبني وبيخاف عليا امسكو الخشب او قولو بسم الله مشاء الله (*_*)0

بحلم كمان لما كنت بسافر الاسكندرية مع بابا في الصيف ولا اسافر عند ماما الكويت كنت لما اقعد علي البحر احلم اني انا وحبيبي بنبص للشمس ساعه الغروب وكان نفسي بقي اتصور صورة الشمس ما بينا زي بتاعت كروت الحب دي عارفيها اكيد (@_@)0


أذكر خمس أحلام تخص مستقبلك و ما تتمناه منه

بحلم اني نور بنتي ربنا يخليها ليا وتتعلم تعليم كويس و تكبر وتكون انسانه كويسة ونافعه وتكون حنينه عليا انا وباباها واشوفها عروسه واشوفها مستقره في بيتها وام صالحه 0
بحلم اعيش في هدوء واستقرار مع جوزي واكمل المشوار وانجح فيه

ومجربش تجربة بابا وماما ومهما حصل منه استحمل واخلي المركب تمشي علشان خاطر بنتي والكلام ده لوحده صحبتي هي عارفة نفسها كويس
(*_^)
بحلم اسكن في مدينه جديده وتكون مدينه حلوة وفيها حدائق كتيرة علشان نور تلعب فيها بلعجلة بتاعتها وتكون بعيد عن الدوشة والدخان واي حاجه تضر بصحته بنتي ويعيش فيه كل الناس اللي بحبهم وميكونش فيها اي شئ يزعجنا ونعيش في هدوء واستقرار

بحلم اني زمن نور بتني يكون احسن وانظف من الزمن اللي احنا عايشين فيه ده علشان مش تتعب في حياتها وتشيل الهم زينا وتعرف تعيش في البلد اللي كلنا بنحبها وتفتخر انها مصرية واني مصر ميكونش فيها اي نوع من انواع الظلم والقهر اللي بشوفه دلوقتي ويكون فيه امان واستقرار وميكونش فيه اي حروب وتعيش في سلام تام هي وكل اطفالنا
بحلم اني ماما ربنا يشفيها ويديها الصحه وتفضل معايا علطول واكون بس يتيمه الاب لاني مش هعرف بعد الشر هيحصلي ايه لو جرا لها حاجه وكمان اني انا واخواتي سواء من ماما او من بابا يكون حنين واني الزمن والفلوس ميغيرهمش ونفضل كدا حنينين وكويسين مع بعض

اصل مفيش بعد الام والاب ربنا يخليهم لكم ومتتحرموش منهم ويرحم اللي مات منهم


أذكر شخصين - على الأقل - متواجدين فى حياتك كنت تتمنى وجودهم من قبل
نـــــــــــور *

لاني مش هعرف اعيش من غير وجودها في حياتي ربنا يخليها ليا يارب ويحميها ويديها طولة العمر وبحمد ربنا علي النعمة اللي رزقني بها

مداونتي *

لاني اتعرفت من خلالها علي اصدقاء كنت اتمناه اعرفهم من زمان وربنا يدوم المعزة والمحبة اللي بينا ونفضل كدا اصدقاء علطول
أذكر شخصين - على الأقل - غير متواجدين فى حياتك و تتمنى وجودهم مستقبلا فى حياتك و حياة أولادك
بــــابــــا *
كنت اتمناه وجود بابا جمبي ويشوف بنتي بتكبر وبتقوله يا جدو الكلمه اللي كان بيحلم بيها ومات قبل ما يسمعها ده مش اعتراض علي حكمة ربنا ولكم مجرد حلم

خــلـود *

صديقتي خلود الكويتيه دي اعز صديقة ليا وصديقتي الوحيده طول فتره اقامتي مع مامتي في الكويت ومكنتش متخيلة اني هبعد عنها ومش هعرف اشوفها كنت اتمناه نفضل مع بعض علطول وتشوف بنتي واشوف اولادها ربنا يسعدها يارب والحمد الله اني بسمع صوتها وبكلمها وبتكلمني .

دول بس الناس اللي افتقدهم بغيابهم عني لكن ربنا ما يحرمني من الناس اللي حواليا واللي بحبهم يارب

اخيرا لمن تهدى التاج
سووو عم الشباب والرياضه
آآبي وحديقة الحيوانات بتاعتها هههههههههه
خالو احمد الصباغ
wanna b a physician
واحد من البلد دي
وكل واحد او وحده نفسة في التاج يتفضلوه ميغلاش عليكم

يااااااااااه التاج ده صعب اووي في اسئلته فضايح يعني ههههههههههههه


تحياتي لكم جميعا

رودي