أجمل يوم في حياتي

بصراحه من كتر التغطية اللي شوفتها عند اصدقائي محتارة اقول ايه ولا ايه
اليوم كان جميل بكل المقايس وكنت مبسوطة اووي والناس فرحانه وسعيده
اول مرا اشوف الحب والموده والصداقة والاخوة دي
بجد انا فخورة اني من المداونين المصرين وفخورة اني بينكم وبينا الاحترام والحب والموده والخوف علي بعض كدا
هكيلكم بقي اليوم بدا معايا ازاي من اوله
اليوم بدا اني قمت مبسوطة ومستنية الساعه تيجي 6 علشان انزل واشوفهم بفارغ الصبر

والحمد الله اليوم عدي بسرعه وجيت انزل طبعا بنوتي حبيبه قلبي شبطتت فيا لبستها وجت معايا

رحت علي المكتبة وانا مبسوطة اني هشوف ناس كتيرة اول مرا اشوفهم

طلعت علي السلم لقيت بنات وشباب كتيرة علي السلم وزحمة يا دنيا زحمة

دخلت وسلم علي ابراهيم عادل ( مداونه انا وانا ) واشتريت كتابه طبعا المسحوق و الارض الصالبة
وكمان لقيت ناس اول ما شافتني خطفو مني نور علطول طبعا خاطيبها الرسمي

عم الشباب والرياضة سووو ( عجوز وعنده 30 سنه )0
وبعد كدا لقيت ( آآبي هانم بتنجان ) ماسكه خطيبها ( اسلام ) يا حبة عيني ومسكه ودنه رغي رحت قولت لها طيب ممكن اسلم ورخمت عليها ورخمت عليا راحت نور بنوتي اخدت حقي ولزقت فيها وفضلت شيلاها علي قلبها وبتلعب في اي حاجه هي لبساها ربنا يسعدها ويوفقها مع خطيبها البت دي بحبها اووي لانها طيبة وحبوبة وخدومه اووي
وطبعا سلمت علي فاتيما واخذتني بلحضون بتاعها الجميل الحنين وسلمت علي نورونورالحقيقة كانت رخمة اووي لانها كانت لسة صاحية من النوم فكانت بتتقل علي فاتيما
وبعد كدا آبي اخذتني وعرفتني بابونا كلنا ( ابو خالد ) وبجد انا حسيت انه فعلا اب لينا كلنا انسان بسم الله مشاء الله وشة كلة نور وايمان انسان محترم جداا وطلب مني اقوله يا بابا وبرغم الكلمة صعبة عليا لكن هو يستاهلها وربنا يدوم عمرة ويخليه لي اولاده ولينا
بعد كدا جت سلمت عليا سحر ( مداونه مفقوعه مرارتها من حماتها ) والحقيقة لقيتها حاجه كدا صغننه ورقيقة ومن هنا بناشد فيفي تخف علي البنية شويا البنت هتختفي من فقعتها من فيفي .

بعد كدا جت حبيبه قلبي اماني ( اخر العنقود ) وشدتني من ايدي وعرفتني بشخصية محترمه جداا بعتز بصدقتها اخي آنس ( صاحب المضيفة ) طبعا التخمين في اليوم ده مش بينجح بنسبة كبيرة لان كل التخيلات اللي كنت متوقعاها كلها مش مظبوطه واني لقيتهم غير كدا وطبعا للاحسن وسلمت علي اخوها الدكتور محمد ( دكتور حر ) انسان في غاية الاحترام فعلا علي رئي البت خيخه انها حقا عائلة محترمه

وطبعا كان نفسي اشوفها بس كالعاده طلعت خيخه ومجتش وبعتت ليا رسالها بتعتذر وبتبلغ اعتذارها للجميع

وطبعا شوفت واتعرفت علي اخي احمد (سكر ) انسان محترم جداا ربنا يخلية لي اولاده ، وكمان سلوي (رئيسة حزب الاحلام ) ونونا (كلاكيت تاني وتاني ) اتنين بحب اتابعهم طبعا سلوي اول مرا اشوفها انسانه محترمه خالص وحبتها اكتر ونونا شوفتها قبل كدا مرا بس محصلش نصيب وقعدت معايا كتير
وطبعا باركت للعروسين احمد الجزاوي وشاهندا علي خطوبتهم وعقد قرانهم ووعدونا بانهم هيعزمونا في الزفاف ان شاء الله
وسلمت طبعا علي هيثم الدهشان وكمان شوفت احمد الصباغ وكاالعاده بيصور وبيعمل التغطية طبعا الناس كانو كتير وزحمة اووي سلمت عليه بلمشاورة

ومحمود الدوح (ميدو في الادغال حاليا) ومحمد (ابن الحجر العسقلاني ) وسوووو كانو في البلكونه من كتر الحر وطبعا رحت لهم انا وفاتيما وشوفتهم هيروحو البورصه ولا لاء وطبعا كان سوووو عامل مفاجئه لفاتيما وقايلي عليها علي المسنجر اننا هنحتفل بعيد ميلادها

وطبعا اتعرفت علي انسانه انا مبسوطه اني شوفتها واتعرفت عليها داليا ( قوس قزح ) ام نور انسانه جميلة وعقلة جداا وحنينه اووي ربنا يخليها لي ابنها يارب
وسلمت علي مايكل وطبعا انا شوفته قبل كدا في التبرع بلدم انسان جميل وطيب اووي
ووسالت علي مروه ( لماضة) وطبعا قالولي هتلاقي حاجه كدا سفروته وصغننه المهم دورت علي وفي الاخر وصلت لها سلمت عليها والحقيقة هي هادية جداا ورقيقة جداا وبتتكسف برغم لماضتها اللي بنشوفها فعلا سعيده اني شوفتها وابي وفاتيما جم قعدو معانا

وسلمت كمان علي الاستاذ احمد القاضي (يا مركبي ) وطبعا انسان غاية في الاحترام وشخصية الواحد يفتخر بيها برا مصر واللي جيه مخصوص من السعودية وشنطته جمبه الله يكون في عونه ويوصلة بلسلامه ان شاء الله
قابلت كمان شريف (سيبو في حاله ) وهو صديق احمد الصباغ في الشغل انسان محترم جداا الحقيقة وطلع من الاسماعليه بلدي التانية

وطبعا انا من اول ما وصلت وانا نفسي اشوف داليا ( اهو ده عيبة ) سالت عليها سوووو وآبي ولقيتها وسلمت عليها وطبعا كنت شايلة معايا سلامات من صديقنا المشترك محمد ( الواد الشقي ) واللي عرفته ببلوج وهو عرف داليا الموقع واشتركو الاثنين في بلوج شوفتم النصيب في الاخر نتجمع كلنا وكل واحد من محافظة ، الحقيقة كنت رسمه لها صورة وطلعت احلي من الصورة بكتير انسانه جميلة وهادية ورقيقة وكنت مبسوطه بيها جداا لاني معجبة باسلوبها جدااا واخذنا طبعا احنا البنات ارقام بعض علشان يكمل التواصل بينا

طبعا كان نفسي اتعرف علي ناس كتيرة بس معرفتش الدنيا كانت زحمة اووي والجو حر ونور معايا وكمان المفروض اننا هنروح علي قهوه البورصة علشان عيد ميلاد فاتيما

ورحنا علي البورصة أنا وداليا وسحر وسلوي و نيرمين وسوو وابي مشيت مع خطيبها اسلام

ووصلنا هناك وكانت المفاجئة انهم كلهم جم علي البورصة وكان يوم جميل جداااااااااااااا

وقابلت هناك الاستاذ محمد علي ( يوميات عيل مصري) وانا سعيده جداا اني اتشرفت بمعرفتك وكان نفسي اتعرف علي حضرتك من زمان مع الصباغ

وكمان قابلت شخصية جميلة جداا وسعيده اني شوفته هو خالد (همس الاحباب)0

وكان نفسي اقعد اكتر من كدا واتعرف علي كل من
الاستاذ محمد شلبي ( عصفور المدينه) والاستاذه ايناس لطفي والاستاذ ايهاب عمر (مداونه ايهاب عمر ) والاستاذ محمد مفيد والاستاذ احمد البوهي والاستاذ احمد مهني وشيماء الجيزي واللي كانت بدور عليها داليا اهو ده عيبة وملحقتش اشوفها ولا اتعرف عليها .

انا سعيده باليوم ده ونفسي بجد يتعوض ويجي فيه كل اللي مقدرش يجي زي خالتى فرنسا ربنا يشيفيها يارب ويرجعها لنا بلسلامه و عبده الرايق و بطوط وخبيب و دوبا و كاميليا و خمسة فضفضة ومونا ليزا و قطة الصحراء و الطائر الحزين و برقش والبت خيخه ومحمود ( رئيس جمهورية نفسي اللي كلمته علي موبيل آآبي وسلمت عليه وفرسته شويا وكان نفسة يجي بس ظروف شغلة بقي الله يكون في عونه ، كان نفسي لولو (وحده مفروسة ) ناس ناس كتيرةكان نفسي اشوفهم سمحوني لو كنت نسيت حد

بجد مش عارفة اوصف سعادتي لما شوفتكم

ياريت كل واحد من اللي شافني يقول ايه الصورة اللي كانو رسمينها غير اني نكادية وحزينه ههههههه

بحبكم في الله

رودي